作為一個80後的港爸，已有兩個女兒（第三個將於今年六月面世），其實都算罕有。身邊的朋友全副心機在職場拚命攀升，或是籌備婚禮當中，又或正在北歐體驗生活，最過分係仍然能夠無憂地通宵打機睇波睇動漫。
而我就每日不停換屎片、餵食飯、再換屎片、氹佢地笑、氹佢地瞓覺、然後又再換屎片，周而復始。所以作為爸爸，一定要學懂一個字，就是「退」。
當同事叫你Happy hour，你要「退隱江湖」。
當兄弟叫你食飯唱K，你要「退避三舍」。
當太太要你洗奶樽換屎片，你要「後退一步，然後上路」。
當兒女要陪佢玩陪佢癲，你要「退化卅年」。
當學懂「退」後，距離成為成功爸爸的目標，就行近一大步喇。
唔明？唔緊要，繼續留意我嘅分享，一齊成為出色港爸啦👍
Search